أهداف صيف ٢٠١٦ \ صيف الإنجاز♥.

by - 6:07 م






و بدت الإجازة الصيفية اخيراً  ان شاءالله تكون اجازة جميلة
مُختلفة و مليئة بالانجاز♥.


طبعاً واضح من العنوان الموضوع عن شو :
أهداف صيف ٢٠١٦♥♥♥.


من اسبوع الفاينلات وانا افكّر بهذي الاجازه، و طرت ع بالي مليون فكره
اسويها في الصيف،  و اول ما خلّصت سحبت على الأفكار و تبخّرن !


ف رجعت مرّه ثانية اجمع افكاري و احط أهدافي، عشان استغّل الاجازه
يوم ب يوم، و اخليها اجازه مُميّزة و مختلفة عن باقي الاجازات اللي مرّن علي♥♥.


سبب مُشاركتي لأهدافي لهذا الصيف وايد، اول سببّ انها تكون حافز
عشان اتحمّس انجز الأهداف و اخلّصها ، و ارجع في نهاية الصيف و اكتب لكم
عن انجازات صيف ٢٠١٦♥♥.
السبب الثاني هو اني كنت ادور في قوقل عن موضوع نفس هذا الموضوع
عشان يلهمني و اخذ منه افكار لأهداف يديده يمكن ما تطري على بالي، لكن للأسف ما حصّلت:(.


ف قررّت احط أهداف من نفسي، و اشارككم فيها عشان أتحمّس انجزها
ولأنّه  يمكن هذي الأهداف تلهم شخص منكم♥♥.



LET'S START




١- اخذ مساق لُغة فرنسية و لغة ألمانية اون لاين.


اللغة الفرنسية و اللغة الألمانية انا ادرسهن في الجامعة كتخصصات فرعية ف مب يداد علي
لكن اللغة تحتاج مُمارسة، و بما انها اجازة طويلة اذا سحبت
بنساهن، ف خذت كتاب لتعلّم اللغة الفرنسية، بالاضافة الى اني سجلت
في مساق اون لاين مجّاني لتعلم اللغتين.
الموقع يوفر عدة مساقات ف اللي حاب يختار لُغة ثانية او اي مساق ثاني
يقدر، و اذا خلصت المساق بنسبة ٨٠٪ باخذ شهادة ان شاءالله♥♥.

انا مب هامتني الشهادة وايد لاني ما ادري مُعترف فيها او لاء،
انا مهتمه بمحتوى المساق اكثر.
الموقع ( هنيه ) ما اعرف تفاصيل وايد عن الموقع، بس خذت لفة على الكورسين
و قررّت اسجلهن.


مب لازم تكون عندكم خلفية عن اللغة الفرنسية او الألمانية، تقدرون تسجلون و تبدون من
الصفر لان المساق هذا عن الأساسيات، ف حلو انكم تتعلمون لغة يديده او اذا عندكم خلفية عنها
تطورونها و تمارسونها و تستغلون الاجازه،.



٢- قراءة ٥ كُتب على الأقل.


طبعاً فوائد القراءه ما يختلف عليها اثنين، و اذا كانت رواية ما منها فايدة فهي للتسلية
او لتقوية اللُغة العربية، ف هدف من أهدافي اني اقرا
على الأقل ٥ كتب من ضمنها رواية باللغة الانجليزية لتقويتها.
الكتب بتكون متنوّعه، رواية\تطوير ذات\دينية و الخ . .


و ان شاءالله بكتب رأيي عن كل كتاب استفدت منه
او استمتعت بقرايته، او كان مضيعة وقت.





٣- بناء عضل \ قضاء على الدهون.
هالهدف له سلسلة خاصة، اخطط لها من فترة لكن بعدني
ما جمعت و رتبت كل الأفكار.


ما حددت رقم انقصه لأن الرقم مب مقياس، العضل عبارة عن وزن ايضاً
ف يمكن يزيد الوزن بدال ما ينزل و يمكن يكون ثابت بس الشكل يتغير
وهذا هو المطلوب، لكن يمكن اذا كتبت عن انجازات صيف ٢٠١٦ اتطرّق للرقم.





٤- اخذ مساق HTML ♥.
هالمساق اون لاين بعد، احسّه بيفيدني وايد في المدونة و تصميمها
عشان جي قررّت اخذه، وان شاءالله انه فعلاً يفيدني.
الموقع ( هنيه ) يختلف عن الموقع السابق  وما له شهاده♥♥.





٥- أهداف دينية.
هالأهداف اعتبرها خاصةّ بيني و بين ربي، ف كتبت أهداف دينية
عشان ما تحطون اهداف دنيوية فقط و تنسون هذا الجانب♥.
ولكم حرية الاختيار تحت هالبند اذا تبون، ختم قرآن\حفظ أجزاء\حضور محاضرات والخ.
هذي امثلة بسيطة واكيد في أكثر، ف لا تنسون هذا الجانب♥♥♥♥.


تقريباً هذي هي كل اهدافي لهذا الصيف، كتابتها سهلة لكن تطبيقها ما اتوقع
يكون سهل خصوصاً انها اجازه وفيها طلعات و جمعات أهل و الخ..
لكن ان شاء الله اني بكون قدّها♥♥.
التفاصيل الدقيقة مثل تقسيم الاهداف على اليوم\الشهر\ والخ، ما كتبتها عشان ما يطول الموضوع
ويكون مُمل♥♥.


اللي حاب يعرف تفاصيل أكثر، يتابعني على سناب جات
بس اضغطو على هذا الرابط ، وبيطلع لكم السناب كود و اليوزر ( هنيه )♥♥.


ان شاءالله اهدافي تعطيكم افكار عشان تحددون أهدافكم الخاصة،
طبعاً كل شخص يختار او يحدد هدفه على حسب اهتماماته و احتياجاته♥♥
و اخر نقطة بقولها هي :
أن اهداف الصيف تختلف عن اهداف شهر رمضان الله يبلّغنا اياه لا فاقدين ولا مفقودين.


اذا حددّتو اهدافكم للصيف شاركوني فيها في الكومنت
نلتقي في مواضيع أُخرى.

You May Also Like

6 التعليقات

  1. حبيته كثييير
    اهداف بسيطة وملهمة واعتبرها انجاز كبيير ❤️❤️❤️
    ربي يسعدك ويحفظظك

    ردحذف
  2. يارب تحققيها كلها وأكثر
    أنا يهمني الهدف الثالث وشغالة عليه❤️❤️

    ردحذف
  3. ماشاء لله مدونة جميله كاصاحبتها
    أتمنى لك توفيق أختي في أهدافك رائعه وتحقيقها
    لدينا بعض القواسم المشتركه في اﻷهداف
    تشجعي ولتكن إجازة إنجاز

    ردحذف
  4. حبيت الاهداف ان شاء الله تقدري تحققيها

    ردحذف
  5. ماشاء الله عالهمّه والعزيمه .. حبيت الأهداف قليلة تقدرين تركزين عليها ، وبنفس الوقت شاملة ومفيدة ..

    موفقه .. ❤

    ردحذف
  6. ما شاء الله
    اهنيك بصراحة على التخطيط المسبق متأكده بيساعدك عالانجاز كثير
    حبيت تعلمك للغة الالمانية لان قليل ناس مهتمين فيها، شي مميز صراحة
    ان شاء الله تكونين حققتيها كلها واكثر بما ان الصيف خلص

    مدونتك جميلة و انيقة
    اتمنى لك التوفيق

    ردحذف