عصفور النافذة: كتب أثّرت فيني♥
يا اهلاً و سهلاً | عُدنا من يديد ♥.
و بشيّء يديد بعد وهو " عصفور النافذة "
عصفور النافذة : هو تعاون بين مجموعّة مُدونّات
ندون كل شهرين عن موضوع معيّن من اختياركم انتو !
التصويت كان في تويتر لكذا موضوع و الموضوع اللي ترشّح هو اللي بين
ايدكم الحين " كتب أثّرت فيني " ♥♥♥♥♥.
اذا حابين تتابعون تدوينات عصفور النافذة ؛
تابعوا نافذة المدونات فيها اكثر من ٥٠ مدونّة تقريباً
كل المواضيع والتدوينات اليديدة سواءً تخص عصفور النافذة او لاء
بتلقونها في القناة و مواقع التواصل الاجتماعي الخاصة فيهم ♥.
بوست اليوم عبارة عن كتب أثّرت فيني ، بتكلم عن ثلاث كتب بسّ
مب ضروري هالكتب غيّرت أشياء فيني او أثّرت فيني بشكل مباشر
خلنا نقول حبيتهن و مستعدّه اقراهن مرة ثانية و ثالثة ؛ حسيت بمشاعر
حلوه وانا اقراهن و استمتعت أكيد بقرايتهن ، . .
طبعاً الاختيار بين قائمة الكتب اللي عندي كان صعب والله ؛ احترت شو اختار
من الكتب اللي حبيتهن ، واخيراً رسيت على هالثلاث ♥
( أقومُ قيلاً ، تغريد في السعادة و التفاؤل و الأمل ، فئران أمّي حصة ).
حاولت أنوّع في الكتب شويّ ؛عشان اللي يحبون الروايات
او اللي يحبون تطوير الذّات و الخ يستمتعون بالبوست .. ♥ ♥ ♥ .
وفي النهاية كلّ شخص وميولة ؛ اختارو اللي يناسبكم من الكتب هذي
و ان شاءالله تستفيدون من المراجعة ♥ ♥ ♥.
نبدأ؟
( فئران أمّي حصة ) ♥
للكاتب: سعود السنعوسي
عدد الصفحات: ٤٣٧ صفحة
النوع: رواية
رواية فئران أميّ حصة تفوز بأجمل رواية قريتها هالسنة و السنين اللي خطفن..
كانت قبلها رواية ساق البامبو لنفس الكاتب، لكن هذي تفوز عليها .. ومن هالمنبر
أعلن ثقتي في هذا الكاتب المُبدع
الرواية هذي فيها كميّة رسائل هادفة مُبطنّة و صريحة، بالإضافة لهذي الرسايل
فهي مُمتعة و كلمة مُمتعة قليلة في حقهّا، الشخصيّات السرد و الاحداث جداً جميلة !
التنقل بين الحاضر و الماضي كان له جوّ و متعة خاصة ، الرواية تتكلم
عن الزمن الجميل في الكويت وكيف كلّ الناس سواسية عايشين على قلب واحد بدون " طائفية " ؛
و التنبؤ بما سيحدث مستقبلاً عند
انقسام الدين لـ أحزاب و طوائف ، و بداية الصراعات الطائفية، حرفياً دخلت جوّ مع الرواية
احس عشت و تخيّلت كل تفصيلة صغيرة كتبها الكاتب؛ عشت مشاعر الخوف و و التفرقة و العنصرية
و الحبّ و أكثر ؛ " كتكوت ، أولاد فؤادة ، أمي حصّة، فوزية ، والخ " شخصيات مستحيل انساها.
كتبت عنها في تويتر أول ما خلصتها ؛ بتاريخ ٤/٦/٢٠١٦:
" الرواية جميلة جميلة اتعب وانا اقول جميلة، الوصف رهيب يعيشك الأحداث بالتفصيل،
وصف الأماكن وأسماء الشوارع و الفكرة نفسها رهيبة ،
الرواية تتكلم عن الطائفية و العنصرية في الكويت ولكنها للأسف واقع معاصر نعيشه في
أغلب البلدان العربية حالياً ،
وأي مكان تسوده الطائفية و العنصرية يتفكك وينهار، مثل أحداث الرواية تماماً .
الكاتب تدرج في الأحداث من بداية الفتنه إلى اشتعالها وصولاً إلى تأثيرها و اللي يُعتبر تنبؤ
باللي بيصير اذا استمر الوضع على ماهو عليه
التفاصيل في الرواية جداً جميلة ، تنبؤه باللي بيصير في عام ٢٠٢٠ اذا استمرّ الوضع يخوف.
ابداً ما بترددّ أقرا روايات #سعود ـ السنعوسي خصوصاً بعد #ساق ـ البامبو و هذي الرواية .
فئران أمي حصة بتكون ضمن قائمة أفضل الروايات اللي قريتها في ٢٠١٦ . "
٢٠١٦ انتهى وفعلاً هالرواية تفوز على جميع الروايات اللي قريتها ، مب بس روايات ٢٠١٦ !
فئران أمي حصة
من الكتب او الروايات اللي استحقّت وقتي
وما عندي مانع ارجع بعد فترة اقراها مرّه ثانية♥.
( تغريد في السعادة و التفاؤل و الأمل ) ♥
للكاتب: عبدالله المغلوث
عدد الصفحات: ١٦٠ صفحة
النوع: تنمية بشرية "تطوير ذات"
هالكتاب خفيف جداً و لطيف ع القلب ؛ فُل طاقة إيجابية و كلام مُحفّز !
أمانةً ما خلصته ولا أريد أخلّصه احس ما بلقى شراته ♥♥.
الكتاب عبارة عن قسمين قسم يبدأ ب اقتباسات مُلهمة مع رسمات لطيفة♥♥ ،
جداً حلو تبدون فيها يومكم؛ الافكار رُغم بساطتها إلاً انها مؤثرة .
القسم الثاني فيه قصصّ و مواقف مُحفزّة و مُلهمة ،وهو الجانب الأجمل من الكتاب ♥♥
حلو هالكتاب لوقت الروقان ؛ او لو كنتي مُحبطة بيعطيج طاقة وبيرفع لج المعنويّات !
من كثر ماهو خفيف ينفع فاصل بين الكتب الثقيلة و الدسمة ، في يلسة وحده تقدرون تخلصونّة
لكن متعتة ف أنكم تتأملون كل يوم اقتباس♥ ، و كل فترة قصة محفزّه تشحن لكم الطاقة ♥♥♥♥.
( أقوم قيلاً ) ♥
للكاتب: سلطان موسى الموسى
عدد الصفحات: ٢٢٣ صفحة
هالكتاب كتبت عنّه في سنة ٢٠١٥ و تحديداً ١/١٠/٢٠١٥
هذا كان أوّل انطباع عن الكتاب ..
" كنت متحمسه للكتاب بشكل ، من كثر ما قريت عليه مدح و كلام إيجابي ! و أنّه مُفيد
و تحمست بعد للمُلخص المكتوب ورا الكتاب . . المهم اني خذته و في البداية قريت الإهداء
و شدني أحسّ انه اهداء وصل لي معنى ، يمكن البعض يحسه عادي بس انا عيبني
ليش عيبج؟ ما أدري بس عيبني
المُهم قريت المُقدمه و كنت متحمسه أعرف قصة المُلحد بعد ! لكن اكتشفت ان قصة المُلحد ما تتجاوز إلاّ
أسطر قليلة و الأساس من الكتاب هو مواضيع أخرى تردّ على الإلحاد ،
ف حسيت شويّ ان الكتاب ممُل و وقفت قرايـه ما قريت الا يمكن 10 صفحات أو أقلّ
ف للحين ما عطيت الكتاب حقّه ، وعشان ما اظلم الكتاب و عشان اعطيه حقّه بقراه من أول ،
" يمكن كان مزاجي مش ولا بد وقتها 
" ، المهم بلخص كل معلومَة يديده ما كنت أعرفها و أضافها لي الكتاب وبشارككم فيها،
" ، المهم بلخص كل معلومَة يديده ما كنت أعرفها و أضافها لي الكتاب وبشارككم فيها،
و ان شاءالله بتاريخ 8\10 بكون خلصتّه . . أحس ان عندي ثقه بالكِتاب و بمدح الناس له !
لكن احتاج مخّ صافي و مزاج رايق مثل مزاجي حالياً "
حالياً أشكر نفسي لأنّي عطيت الكتاب فرصة ! الكتاب يتكلم عن : الردّ على حجج الملحدين
مكانة المرأه في الإسلام، قراءة في شخصيّة ابليس ، حقيقة وجود الإله و الكثير
جدياً الكتاب يعد من أفضّل الكتب اللي قريتها ، فتحّ مداركي و وسعها تجاه هذا الموضوع ..
نشطّ فيني الفضول تجاه هذي المواضيع و بديت احسّ انها مواضيع مُثيرة للاهتمام ،
الكتاب باعتبار انّه يرد على المُلحدين ، وايد ناس قالت الكتاب ما ردّ عليهم .. لكن عن نفسي
ما يهمني لو كان الكتاب ردّ عليهم او لاء كثر ما اني استفدت منه وايد !
اشوف ان الكتاب غطى جوانب وايد حلوه عن الاسلام وسدّ اكثر عن باب و تساؤل
كان يدور في بالي؛ في مواضيع وايد تخصّ دينا تطرّق لها تستحق الاهتمام ،
في وايد انتقادات على الكتاب ؛ بس بالنسبة لي ك قارئة مبتدئة في هذا الموضوع
او في الأديان الشرح جداً بسيط و غير عميق و مُفصلّ سهل عليّ افهمه، ما يحتاي
اكون خبيرة في هذا الموضوع عشان افهمه وهالشيّ وايد حبيته في الكتاب ،
في كذا قصّة ثبتت في بالي اذكر اني من كثر ما حبيته كنت اشارك كم قصّة او خلنا
نقول " موضوع " من الكتاب في سنابي وكان التفاعل رهيب♥♥ .. الكتاب يستحقّ القراءة
ما بياخذ منكم وقت وايد ؛ و مواضيعة تستحقّ اذا كنتو مبتدئين في قراءة هذا النوع من الكتب♥♥.
الكتاب يخاطب مستوى القرّاء " الغير متخصصين " في الموضوع ؛ لا تتوقعون انه عميق جداً
بالعكس يناسبكم اذا كنتو أولّ مره تقرون في هذا المجال ♥.
و كقُرّاء مب كل معلومة تاخذونها من أيّ كتاب صحيحة ١٠٠٪ تختلف المصادر
و تختلف الاراء حول المعلومات و المواضيع - اذا شكيتو او اثارت فضولكم اي معلومة
في أيّ كتاب تأكدّو منها؛ عشان تستفيدون أكثر ♥
و اخيراً وصلنا لنهاية البوست ؛ اتوقع ان هذا اكثر بوست طوّلت فيه !
ان شاءالله انكم تستفيدون منّة \ + اغفرو لأيّ اخطاء او قصور♥♥♥♥
الكتب قريتها من فترة طويلة وللأسف ما كتبت وقتها ريڤيو عنها ؛
ف حاولت أتذكّر اللي أقدر عليه♥.
شاركوني في الكومنت شو الكتب اللي حبيتوها؟ او اللي قريتوها و أثّرت فيكم♥؟
نلقاكم في تدوينة أخرى♥♥♥.
5 التعليقات
صباح الهمة والنشاط ، شوي وأقوم اسويلي قهوة لما شفت القهوة بالصورة :)
ردحذفإختيارات مشوقة و تجذب ، فئران أمي حصة : مدحته أكثر من شخصية أثق بذوقها و أعتقد إنه ضمن القائمة الي مدري متى تشوف النور :|
كتاب تغريد : كان عندي الكتاب ، حبيت الديزاين والألوان والطباعة لكن للأسف م أميل لهالنوع من الكتب ، أعتقد عندي مشكلة مع الكاتب وليس الكتاب .
كتاب أقوم قيلا : أكثر كتاب الآراء حوله متضاربة ، بعضها تحمسك تقرأينه الآن ، والبعض الثاني يخليك تشطبينه من قائمتك ، موضوعه شيّق لكن م أعتقد إني ممكن في يوم أقراه لأني إنسانة أتشرب الأفكار واتبناها ، وأخاف من هالشيء بالأمور الدينية ..
استمتعت للآخر وأنا أقرأ ، خصوصاً إنو الكتب أعرفها مسبقاً بس كنت متحمسة لرأيك وتجربتك ❤︎
مساء الخير علّوي اول شي أسلوبك جميل يعطيك العافية 💞 ثانياً مرا تحمست اشتري رواية فئران امي حصة من كلامك حسيت أسلوبه سي كتاب الروايات الإنكليزية و كتاب تغريد عند اختي و برضوا عاجبها زيك ان شاء الله راح اقرأه و ثالث كتاب أقوم قيلا قراته السنة الماضية و إيدك في كل كلمة قلتيها فعلاً الكتاب فتحني على أشياء ما كنت اعرفها و خلى عندي فضول اعرف الديانات اكثر
ردحذفحبيت الصوره رووعه
ردحذفوتحمست اقراء الروايه😍
تحمست اكثر شي لكتاب عبدالله المغلوث ❤❤❤!! شكرا علوشه ��
ردحذفاقوم قيلا من الكتب الجميلة اللي استمتعت بقراءتها ، فئران امي حصه تحمست كثير
ردحذفخصوصا اني حالياً اقرا ساق البامبو وعاجبني
استمتعت كثير وانا اقرا مراجعات الكتب
شكرا حبيبتي💗