فوتوشوب: تعديل إضاءة الصور بطريقة سهلة♥.

by - 2:22 م





اهلاً اهلاً | مساء\صباح الجمال!
و عدنا من جديد ببوست غير مُخطط له، ارتجالي مثل ما يقولون ! بما اني كنت
اعدّل الصور قلت ليش ما انزّل بوست عن طريقة تعديل إضاءة الصور !
بطريقة سهلة و وااايد سهلة بعد وما تاخذ وقت .

للي أبداً ما استخدمو الفوتوشوب؛ بحاول أشرح بطريقة مُفصلّة جداً
عشان يكون سهل عليكم، واساساً الموضوع مُب محتاج .


احس البوست بيفيد البلوقرز و المصورين أكثر؛
لانّة عبارة عن مُجرد تعديل إضاءة مثل ما تشوفون ..

قبل ما نبدأ بقول كم نقطة بتسهل عليكم الفهم:
- رقمّت الصور عشان تتبعون الصور الصح وما تخربطون | الرقم على يمين الصور .
- الشرح على فوتوشوب Cs6 | و اعتقد الاختصارات نفسها ف كلّ الاصدارات .
- cmd هو نفسه ctrl في نظام الوندوز .

التعديل بسيط جداً فقط تعديل إضاءة و ألوان ويناسب المبتدئين بعد ؛
ان شاءالله بيكون في بوستات أكثر احترافية ، بس خلنا نبدا من الزيرو ♥.

يلا نبدا :
- اول خطوة هي تفتحون الصورة اللي تبونها | وأسهل طريقة هي
cmd+o - او تروحون أعلى الشاشة file\open.


- صورة١: بعد ما تفتحون الصورة اذا كانت من الكام اكيد بيكون حجمها كبير؛ ما بتناسب المدونة !
ف روحو فوق الشريط أعلى شي | image - size ! عشان تصغرون الحجم.

- صورة٢: بتطلع لكم النافذه اللي على اليمين غيرّو الحجم حسب ما يناسب مدونتكم
لانه الحجم يختلف من مدونة لمدونة حسب عرض صفحة البوست ؛
انا جربّت كذا حجم؛ و اكثر حجم ناسب المدونة هو ٧٠٠*٤٦٦ !
مجرد ما تغيرون العرض - width بيتغير الطول بروحة | عقب اضغطو اوك.


- صورة٣: بعد ما تضغطون اوك بيصغر حجم الصورة ؛ لكن هذا مب حجمها الأصلي
اللي هو ٧٠٠ | ف روحو يسار تحت بتلقون هذا الرقم غيروه لـ ١٠٠٪
عشان يطلع حجمها كامل و يكون سهل عليكم تعدّلونها.


- صورة٤: أول شي أحب اسوية قبل ما أعدّل الإضاءة هو اني ازيد حدّة الصورة
اوّل شي - روحو أعلى شي عند filter - عقبها sharpen - عقبها بعد sharpen
و بتزيد الحدّة بتبرز التفاصيل أكثر♥.


- صورة٥: الحين بنبدا ف تعديل الإضاءة | اول شي روحو فوق image !
بعدين adjustments و بعدين brightness\contrast .

- صورة٦: بتطلع لكم النافذة هذي ؛ ال brightness هو السطوع إذا زدتو الرقم بيزيد السطوع
واذا قللتو الرقم للماينس بيقل ، طبعاً انا ما احبّ اقلل السطوع ابداً بالعكس احب السطوع عالي .
بس يعتمد احياناً على الصورة نفسها، ف زدت السطوع شويّ بس.
ال contrast هو التباين ، التباين يوضح الألوان كل ما قلّ الرقم صعب نفرق بين الالوان
تكون الصورة باهتة، ف زيادة رقم التباين تعطي الالوان حياة تقريباً !

طبعاً الارقام تعتمد على الصورة نفسها ف الارقام اللي انا حطيتها مُب مقياس،
انتو شوفو شو يناسب الصورة اللي عندكم و حطو الرقم على اساساها♥.


- صورة٧: الخطوة الثانية في تعديل الإضاءة | نفس الطريقة روحو فوق image !
بعدين adjustments و بعدين levels .

- صورة٨: بتطلع لكم النافذة هذي ؛ تقدرون تسحبون الاسهم كلها ، عشان توازنون الوان الصورة
طبعاً حسب ما يناسب الصورة اللي عندكم ، جربوّ وشوفو التغيير !
انا سحبت السهم اللي على اليسار جهة اليمين ف استوت الالوان أغمج ، 
او تقدرون تغيّرون الرقم اللي ع اليسار بدال ما تسحبون الاسهم . .
انا استخدمت اول سهم ع اليسار وغالباً هذا السهم او الرقم الوحيد اللي أغيره وحسيت الصورة تمام♥.



- صورة٩: اخر خطوة هي التشبّع اللوني ، يعني بالعربي تعطون اللون حقّة🌚.
ضغطو من الكيبورد على cmd+u بتطلع لكم هالنافذة ! تقدرون تجربون كل الأشياء
وتشوفون اذا التغييرات تناسب الصورة! بس الشيّ الوحيد اللي انا احب استخدمه التشبّع 
اللوني اللي هو saturation ، زدت القيمة بنسبة بسيطة تكفّي الصورة ♥.


وهذي الصورة قبل التعديل :


مافيها حدّة الإضاءة عادية ما اقدر اقول سيئة لانها إضاءة الشمس بس نقدر نخليها احسن
و اخر شي الالوان مُب مشبعة♥.


بعد التعديل♥:


حدّة الصوره ممتازه ، الإضاءة افضل من قبل بوايد و الالوان مُشبعّة - الصوره باختصار
فيها حياة♥.

وخلصنا الدرس ؛ ان شاءالله يكون سهل و تستفيدون منّه و يكون الشرح واضح .
طبعاً اصدقائي في سناب يعرفون ان البوست غير مُخطط له ، ف اغفرو لأيّ خطأ🌚.
للي حابين يتابعوني ف سناب هذا سنابي اضغطو على الرابط بيطلع لكم اليوزر (هنا)!


اخر شيّ بقوله ترا هذي من ابسط طُرق تعديل الإضاءة ! ان شاءالله الدروس الياية
بتكون احترافية اكثر، تخص white balance و أمور اكثر تعقيداً😁.

till next time♥.

You May Also Like

2 التعليقات

  1. درس لطيف ، مهم للمبتدئين ، وفعلاً تفرق الصور مع إنو مو الكل يلاحظ الفرق لكن حالياً الأغلبية مصورين وييدققون وهالشيء مهم للبلوقرز ..
    أنا اتبع نفس خطواتك وفيه كم حاجة زيادة لكن عن طريق تطبيقات الآيباد ، موفقه علوي 🌸

    ردحذف
  2. جميلة مرة التدوينة أشكرك

    ردحذف