حياتي الجامعية: what's in my uni bag? ماذا يوجد في حقيبتي الجامعيّة؟

by - 2:57 م




صباح/مساء الخير للناس الجميلة♥.
و عٌدنا من جديد ! بموضوع مُختلف عن تدويناتي السابقة ،
و أغلب البلوقرز و اليوتيوبرز تكلمّوا او كتبوا عنه ؛
ماذا يوجد في حقيبتي \ what's in my bag?

هالبوست تحت حياتي الجامعيّة لذلك بيكون :
What’s in my university bag? | ؟ماذا يوجد في حقيبتي الجامعيّة

قبل ما أبدا : البوست عبارة عن اختياراتي و احتياجاتي انا ؛ يعني مب شرط
الأشياء الي أنا احتايها انتِ تحتايينها بعد؛ .. يعتمد عليج و على الوقت
لي بتقعدين فيه ف الجامعة+ على الجامعة نفسها و الأشياء لي توّفرها♥♥♥.

نبدأ؟

قبل ما يبدأ الكورس و وقت التسجيل عرفت انّ  في مادة احتاج فيها اللاب توب ،
ف من البداية قررّت اخذت شنطة صغيره عشان أقدر اشلّ اللاب توب معاي ..
لانّ صعب اني اشلّ شنطة كبيره و فايل ؛
ف خذت شنطة صغيره للأغراض لي بحتاجها + فايل فيه اللاب توب !
الشنطة لي خذتها من :
Charles & keith
شنطهم وايد حلوة ! و اسعارهم بعد وايد معقولة و مناسبة
واغلب الشنط لي عندّي تقريباً من هالماركة♥♥




الأشياء لي مستحيل تطلع من الشنطة:

هالمرطب من لوكسيتان ، وايد احبّه و غالباً اكون مستعيلة ف اطلع من البيت
بدون ما ارطّب ايدي؛ ف ينفعني وجوده ف الشنطة ! قبل ما يبدا الكلاس دايماً
اخذ منه نقطة و ارطب ايدي ، وايد ترطيبة حلو واحبّ ريحته!♥.
ف حلو يكون عندكم ف الشنطة مرطب صغير مثل هذا عشان لو نسيتو ترطبون ايدكم مثلاً
تحلّون الموضوع ع طول🌚؛ خذت حجم السفر للتجربة و عشان ما ياخذ مساحة♥.

روج او مرطّب ، الروج لي احطّه الصبح هو لي احطه ف الشنطة ..
و مرّات لو حسيت شفايفي جافة شويّ استغني عن الروج و اخذ وياي مرّطب فيه لون 
مثلاً لابيلو♥♥.  
و لأن دوامي طويل احتاج انّي اعيد على الروج او المرطب لذلك هالشيئين ما استغني عنهم♥.


و من الأشياء لي مستحيل تطلع من الشنطة:
النظارة و علوج اكسترا ولازم اخضر 🌚 و ربطات للشعر !
في البداية كنت البس عدسات لكن فجأه حسست عيوني منهن اسبوعين تقريباً كانن حمر ،
و رحت المستشفى و قال الدكتور ابتعدي عن العدسات نهائياً ف صرت ما استغنى عن النظارة
ولاني ما احبّ  البسها برّا الكلاسات دايماً تكون فالشنطة و استخدمها وقت الكلاسات بس♥.

علوج اكسترا اخضر يسّد يوعي مرات🌚 و احب ريحته من ايام الثانوي وانا مستحيل استغني عنه♥♥.  
ربطات الشعر اخذها معاي خوفاً لأيّ حادث غير متوقع؛ مثلاً تنقص لي حاطتنها ف شعري 
و اتوّهق ف اختصر الطريق تحسباً لأي موقف طارىء🌚♥.



جرج الفون " الشاحن " مستحيل استغني عنه بدونه اضيع!! لان دوامي طويل 
من الصبح لين العصر ، ف اكيد الفون بيفضّي ، ف احسه من الأشياء الضرورية جداً
تقدرون تستغنون عنه و تشلون المحمول " power bank " بس انا وايد انسى اجرجه 
ف اخذ الجرج بكبره احسن🌚♥.


نظّارة شمسية بما أن جامعتنا مفتوحة وكلاساتي كل واحد ف مبنى ! 
وايد احتاجها لان شمسنا حدّث ولا حرج 🌚 اذا جامعتكم مسكرّة تقدرون تستغنون عنها طبعاً♥.


الفايل هذا اشلّ فيه اللاب توب و دفتر و غالباً كتاب اقراه ف وقت البريك لو كنت بروحي 
و مرّات استغني عنه ما اشلّه لان اقعد مع ربيعاتي ♥.


اللاب توب هب كل كورس اشلّه هالكورس بس لان في مادّه احتاجه فيها
+ انا اعترف اني دقّة جديمة🌚! احب اكتب رغم التطور صامدة؛ احس اني 
لو حضرت الكلاس بدون ما اكتب اي معلومة على الدفتر كأني ما حضرت ! ♥.
وعاد يا ليت ارجع للي كتبته وقت الدراسة ، لا احبّ الخص من اول و يديد 🌚♥.

ف هالشيّ يعتمد عليكم بعد اذا تحبون تكتبون على اوراق او على ملّف وورد !
واذا موادكم تحتاجون فيها استخدام اللاب توب او لاء ♥.


طبعاً قلم للكتابة؛ و مرات اشلّ اثنين لو خوّن فيني واحد يكون الثاني موجود🌚.
اللاب توب استفدت منه في وقت البريك صراحةً اعدل الصور للبوستات \ اشوف مسلسلات و الخ..
♥.

و بجذيه وصلنا لنهاية البوست ؛ طبعاً مثل ما قلت لكم كل واحد و احتياجاته♥.
مب شرط كلّ شي انا احتاجه انتِ تحتاجينه و العكس♥؛

ان شاءالله استمتعتو بالبوست ؛ و كونوا بالقرب دايماً
اصدقاء السناب شافو جزء من هذا البوست سابقاً ؛ ف اللي حابّ
يتابعني في السناب ( هنا ؛ february.23rd )♥♥؛

نلقاكم في بوست يديد♥؛

You May Also Like

8 التعليقات

  1. ليه خلص البوست ��
    مرا استمتعت وأنا اقرأ ، آحب هالنوع من البوستات و أحب مدونتك ��
    ماشاء الله عليك أغراضك مختصرة عالأساسيات ، مو زيي اقش الأكو والماكو لووووووول
    فعلاً اللاب والكتاب من أهم الأغراض بالنسبة لي ، أوقات كثيرة استبدل اللاب بالايباد أخف ..

    ����

    ردحذف
  2. استمتعت كثير وحبيت التصوير
    ماشاء الله يجنن
    وحلو الاب توب ، يفك آزمة لك ويشغل وقتك
    وقت الفراغ
    الله يعطيك العافيه

    ردحذف
  3. حبيت ..اهم شي عندي المرطب والبطاريه ..❤️❤️

    ردحذف
  4. تخميني طلع صح 💃🏽 البوست يجنن أحب هالنوع من التدوينات و تصويرك روعة ما شاء الله 😍👌🏼حلوة فكرة انك تاخذي كتاب معاك يبغى لي أسويها لأَنِّي سرت ما اقرأ كتب زي اول

    ردحذف
  5. تدوينة جداُ ممتعة تمنيت انها ما تخلص :)
    اسلوبك مرررة رايق و تصويـــــرك روووعة الله بارك:)
    الفايل الي تشيلين فيه اللابتوب مررررررررة انيق :) يعطيك العافية عليه ! ابدعتي

    ردحذف
  6. ما اعرف اتكلم عن جمال الصور ولا اللطافه اللي بالتدوينة ، مره حبيييت حسيت فيها لطافة كذا والاشياء مختصرة جدا ❤❤ ، يسعدك عليا 💕

    ردحذف
  7. ...


    الله الله الله ع هالتميز في طرحك

    كم أحب الدراسه و العلم
    اللهم زدني علمًا

    :

    ردحذف
  8. احب ان اقول لك ماشاء الله ابدعتي تحياتي من المملكة المغربية
    لكن عندي سؤال من اين اقتنيت الفايل او حقيبة لحمل اللاب توب المرجو الاجابة وشكرا 🥰🥰🥰😍

    ردحذف