٢٠١٦ في سطور: منتجات حبيتها ، الكترونيات! مواقف ، مدن و سفر ! أهداف، حياة جامعية و أكثر❤️..

by - 10:06 م




يا اهلاً يا اهلاً ؛ عدنا من يديد بآخر بوست في سنة ٢٠١٦♥.
هالبوست بيكون طويل نوعاً ما لانّ بحاول قد ما اقدر الخص فيه سنة ٢٠١٦ الجميلة♥♥♥.
بتكلم عن : مفّضلات هذي السنة من ميك اب ومنتجات عناية و منتجات أُخرى
دول جميلة زرتها و مواقف مستحيل تُنسى في هذه السنة !
" طبعاً مُستحيل اتطرق لكل المواقف وكل الذكريات الحلوة ؛ ومستحيل بعد
احطّ كل الصور الجميلة للمدن او الرحلات ف بيكون الموضوع مُختصر جداً
عشان ما يكون مُملّ ؛ ولان صعب بعد احطّ كل تفاصيل ٢٠١٦ "

ببدأ بالمُنتجات و الميك اب اولّ شي ، و بختمها ب المواقف و الرحلّات
عشان اللي مب حابّ يسمع تفاصيل المواقف و الرحلات ويبا الفايدة بسّ
يستفيد اول شي و يوّفر وقت لو مب هامنّه الباقي♥♥♥♥.

مُفضّلات سنة ٢٠١٦ : مُنتجات حبيتها♥.
نبدأ ب الميك أب؟ ..




أكثر شي استخدمته هالسنة و حبيته و ناسبني؛ هو:
BB cream garnier | Miracle skin perfector.

تكلّمت عنه قبل في هذا البوست " مفضّلات شهر أبريل♥. "
استخدمة وقت الدوام احسّه خفيف ع البشرة ؛ تغطيتة خفيفة نوعاً ما
لكن بالنسبة لي جداً مُناسبة ؛ ما طلّع لي حبوب رغم اني استخدمه من فترة طويلة
تقريباً من بدت سنة ٢٠١٦ ولا سببّ لي أيّ مشكلة في البشرة !
استخدمه في الدوام و يمعات الأهل وفي المناسبات البسيطة ؛ يعطي لوك طبيعي ما يبيّن اني
حاطة طبقات من الفاونديشن يبين وااااااايد طبيعي؛ وهالشيّ اللي حببني فيه ، ..

سعره جداً معقول ؛ اتوقع حول ال ٣٠ درهم♥♥.




garnier | Micellar cleansing water

مزيل المكياج من قارنية ؛ البديل الأرخص لمزيل المكياج من بايوديرما♥♥.
وايد احبّه يشلّ الميك اب من اول مسحة و مرات احتاج مسحتين اذا كان الميك اب ثقيل
ما يحسسّ العين ابداً حتى لو دخل شويّ منّه؛ مكتوب على العلبة انّه ما ينغسل عقب
انا مرّات اكتفي بمسحه منه و مرّات لو حسيت الميك اب ثقيل اغسّل ويهي بغسول عقبه♥.
بالنسبة لي وايد افضل عن " مناديل ازالة الميك اب " المناديل عددها محددّ  اما هذا يعتمد على الكمية
لي تستخدمينها ؛ ومهما كانت الكميّة بتستخدمينه أكثر عن المناديل ،
وايد يطوّل عندي تقريباً يتم شهر و شويّ♥♥♥♥.


maybelline - the rocket volume express♥.

ماسكرا ميبلين الجميلة ؛ طبعاً واضح شقدّ كرفتها من لونها الطاير😂♥♥.
احبّها حقّ الدوام لو كنت حاطه روج خفيف تعطي كثافة و سواد للرموش و يبين اللوك
وايد حلو وناعم ؛ وبعد للعزايم استخدمها كثافتها و سوادها جداً جمممميلين♥♥♥.
عيبها الوحيد مب ووتر بروڤ ؛ مع الماي توصل لين خدّي😂.

بس وايد حلوة و أكيد بردّ اخذ منها للمرّة الألف♥♥





real technique - Core collection

وايد احبّهن كملن عندي فترة طويلة ومع اني اغسلهن الّا  ان ملمسهن نفس ماهو
ما تغيّر فيهن شي ولا اخترب ، و سعرهن بعد وايد مناسب اتوقع بحدود ال١٢٠ تقريباً ؛
هنّ ٤ فرش ؛ فرشة لتحديد التفاصيل كنت استخدمها للحواجب وعقب فترة بديت استخدمها للأرواج ؛
فرشاة للكنتور ؛ فرشاة للفاونديشن ؛ و فرشاة استخدمها للبودرة ♥♥
كرفتهن كرف وللحين مثل ما كانن في البداية ؛ سعرهن رخيص وجودتهن عالية + بديل أرخص
لوايد ماركات♥♥
( ايي معاهن شنطة صغيرة او حافظة للفرش ).

مفضّلات منتجات العناية..




ماسك الطين المغربي و الطين الهنّدي ♥♥
كلهن جميلات وكلهن مفعولهن قويّ ؛ ماسك الطين المغربي ينصحون فيه للبشرة الحسّاسة
لان الهندي اقوى شويّ ؛ تنظيفهن عميق ؛ عقب ما استخدمهن ويهي يلّق من النظافة ؛ يقولون
مع الاستمرار يصغّر المسامات ؛ بس اللي لاحظته انا انّه يشدّ البشرة و ينظفها حتى الرؤوس السودا
مع الاستخدام تخّف ؛ قوي شويّ ع البشرة ف ضروري بعده ترطبون ويهكم♥♥
( كلهن بتلقونهن في موقع iherb + انا خذتهن من تاجرات في الانستا ).

و حبيب قلبي المرطبّ هذا ؛ هو اللي استخدمه عقب الماسكات♥♥.




اكثر مرطّب احبه؛ ع كثر ما استخدمه ما يخلّص😂.
حجمه كبير و ترطيبه عالي؛ واااااايد يفرق الميك اب يوم استخدم هذا المرطب قبله ؛
خذته مرّه من تاجرة في الانستا - وشلوه عني ف المطار حسبي الله عليهم💔.
عقب فترة اختي لقته ف كارفور و يابته لي♥♥♥♥♥.
مب متأكدة من سعرة بس تقريباً بحدود ال٦٠ درهم♥.

مفضّلات أُخرى♥♥:



Samsung nx mini
الحبّ في الحل و الترحال ( جيه يقولون؟) المهم هالكام حبيبة قلبي
وايد استخدامها سهلة للمُبتدئين وتصويرها جداً جميل ؛ استخدمها اكثر شي ف السفر
مع الكانون ؛ الكانون عدستها تكون ثابته ف استخدم هذي للفيديو مرّات و مرّات للمناظر الطبيعية
والاماكن الواسعة ؛ الوانها جداً جميلة وفيها اوضاع جاهزة للمبتدئين كلّ اللي عليكم تختارون الوضع

و تصورون ؛ افكّر اتكلم عنها ف بوست بروحها عشان اعطيها حقّها ف بكتفي بهذا القدر♥.




Polar FT4
من مفضّلات هالسنة و الشيّ اللي يشجعني اسويّ رياضة هو هالساعة من بولار
مميزاتها وايد ؛ منها تحسب الوقت اللي سويتي فيه رياضة + عدد السعرات الحرارية المحروقة
+ ضربات القلب ؛ عن نفسي يوم اشوف عمري حرقت سعرات حرارية وايد اتحمّس احرق
اكثر عنها ف المرة الياية ؛ ف هالساعة وايد تساعدني اشوف وين كنت ف الرياضة وين وصلت♥.
يكون معاها حزام و مونيتور ينحط تحت الصدر و يقيس نبضات القلب♥
خذتها من امازون اتوقعّ التوتل مع التوصيل كان ٣٠٠ او ٥٠٠ ♥♥.

نروح للمواقف و الذكريات♥:


يوم لا ينسى ؛ اصدقاء سناب شهدو الأحداث😂♥.
هاليوم كنا رايحين نخيّم في الشويب ؛ ركبنا البقي هذي انا وعمّي وماهي الا لحظات حتى غرزنا
غرزنا على ينب بعد ؛ وكل شويّ تنزل البقي أكثر كنت ماخذه الوضع عادي لين ضحك عميّ الضحكة
اللي أعرّفها مالت وهقة😂 حسيت الوضع جدّ ؛ نزل هو ونزلت عقبه وحاولو يطلعونها لين طلعت وعدّا الموضوع ع خير !
الله ستر انها ما انجلبت لانها كانت ع يانب العرقوب ف لو طاحت بننجلب لين نوصل تحت؛ بس الحمدلله الله سلّمنا♥♥.
عقب ما طلّعوها ردينا مره ثانية نقطّع العراقيب و نخمّس لين نزلنا تحت و قعدنا ندّور بالبقي ؛ وفجأه
ما اشوف الا الارض مجلوبة والشمس فوقي و عمي تحت و البقي مجلوب ! : علوي انتَ  بخير؟
: انا بخير ، انت بخير عميه؟  : هيه بخير !
البقي انجلب ع ينب ع صوب عمي؛ ف هو تحت وانا فوق بس انا حاطة الحزام ف ثبتت مكاني؛
كنت اشوف عمومتيه الباقين وهم يركضون يايين صوبنا وقلبي طبول انّ شو السالفة؟ تونا بخير😂..
المهم عميّه قالي سوي جيه وجيه عشان تطلعين و طلعت الحمدلله وهو طلع عقب ؛ انا ما تعوّرت وايد
مجردّ كدمات امّا هو طاحت البقي ع ايده ف ايده وااايد تعوّرت💔.

بس الحمدلله مب كسر ولا شيّ خطير والحمدلله الحين وايد احسن ♥♥.
طبعاً هاليوم مستحيل انساه! ذكرى ل ٢٠١٦ بعد ف شهر ١٢ ختامها مسك😂

الحمدلله الله سلّمنا ذاك اليوم و يت ع خفيف مب ع شيّ قوي♥♥.


جولة في ربوع أوربّا كانت من أحلى الجولات ؛ زرنا اماكن قد زرناها قبل
لكن الأجمل الأماكن اليديدة ؛ وقعت في غرام العاصمة التشيكية و مدينة هالشتات النمساويّة
ولا عزاء للبقيّة طبعاً كل وحده تقول الزود عنّدي لكن هذيل اكثر ثنتين وقعت في غرامهن
الجوّ ؛ المناظر؛ السكن بروحة حكاية ثانية؛ مابدخل في تفاصيل الأماكن لانّ افكر اكتب بوست بعد
يكون معلومات شاملة مواقع الفنادق و اسعار واماكن السيّاح لكلّ مدينة و الخ
بس حبيت اسجّل في هذي التدوينة ان هالسفرة من أجمل السفرات و أجمل الاماكن اللي شفتها ♥♥.
الشيّ اللي صدق افتخر فية ان تخطيط الرحلة من مسار الرحلة واختيار الدول و قياس المسافات
و حجوزات الفنادق بإدارتي انا🌚.. وكانت رحلة ناجحة جداً♥♥♥♥.
( الرفقة الحلوه " أصدقاء السفر " - ابوية ، عمّي ، ختية سبب من اسباب جمال هاي الرحلة طبعاً )♥.

الرحلة الثانية المُستحيل تنّسى رحلة تايلند وتحديداً العاصمة التايلنديّة بانكوك♥♥
كنت انا وابوي فقط لا غير ؛ وهالشيّ المُميّز ف الرحلة لكم ان تتخيلّو كميّة الدلع عاد🌚♥♥
هالرحلة وايد تقربّت فيها من ابوي لأن كنا انا وهو فقط ؛ مب أوّل مره ازورها لكن
هالسفرة بالذات اكتشفت جانب تايلند الجميل بعيداً عن شارع العرب الوصخ قليلاً 🌚
( أبوي شيخي وصديقي و حبيب عيني ، الله لا يحرمني منّة )
المميّز في هاي الرحلة بعد انها ف وقت الدوامات ؛ صح ان غياباتي خلّصت وكلت تبن
شوي يوم ردّيت من السفرة🌚 ؛ لكن ما ندمت ابداً♥.

اذا حابين تفاصيل أكثر بكتب عنها بوست وعن الأماكن السياحيّة فيها♥.


صلالة او خلنا نقول أوربّا الخليج ؛ 🌚.
الجوّ  و المناطق الخضرا و الصُحبة الجميلة سببّ من اسباب نجاح هالرحلة ♥. 
كلّ سنة نترك بصمة فيها ؛ لكن كل سنة تكون اجمل من قبل ؛ طبعاً هاي لو افكر
اكتب عنها بوست ؛ انا بروحي بكون موسوعة😂
من عادات وتقاليد العايلة ان كلّ سنة نروحها🌚.

* سنة ٢٠١٦ باختصار♥:

في سنة ٢٠١٦♥:
عرفت منو أنا بالضبط فهمت نفسي أكثر ؛ عرفت شو احبّ وشو ما احبّ
عرفت الكتب اللي تناسبني ؛ الجوّ اللي احبّه ! هواياتي بالضبط شو هي؟ فهمت نفسي أكثرّ
وحبيتها أكثر !

في سنة ٢٠١٦♥:
تعلّمت أقول لاء متى ما ابا ؛ تعلّمت ان نفسي و راحتي اولاً ثم البقيّة من بعد♥.

في سنة ٢٠١٦♥:
اهتميت اكثر بحبّي للتصوير ؛ طوّرت الاهتمام ووصلت لمرحلة انا راضية عنها
لكن ما زلت أطمع بتطوّر أكثر ؛ تطوّرت واااايد في تصوير و مونتاج الفيديو و في التصوير العادي بعد♥.

في سنة ٢٠١٦♥:
وصلتني طلبات تصوير من مصممّات و مطاعم و حتى طلبات شخصية لبطايق دعوة " اعراس " . .
وهالشيّ انا جداً فخورة فيه♥.
اذا حابين تتابعون يديدي فالتصوير ؛ el3liaa في الانستقرام♥


في سنة ٢٠١٦♥:
رفعت معدّليه الجامعي ، " معدلنا من ٤ ".
اول كورس في سنة ٢٠١٦ وصل ٣.٨ الفصلي و التراكمي ٣.٢
والكورس الثاني ٣.٧ الفصلي و التراكمي ٣.٤ و عقبال الامتياز ( ٣.٦ ) ♥.

في سنة ٢٠١٦♥:
دوّنت بحبّ ؛ دونت أكثر؛ تعرّفت على ناس في هالمجال استوو يعنولي الكثير♥.

في سنة ٢٠١٦♥:
سافرت لدول من زمان حاطتنها ضمن الدول اللي حابّة ازورها وبعدني اطمع
في اني ازور واستكشف المزيد من الجمال الخارجي♥.

في سنة ٢٠١٦♥:
كانت اولّ تجربة لي في التطوّع مع نادي التصوير؛ كانت اول تجربة لي في التصوير في استوديو مُصغّر
في بوث في معرض الكتاب ♥.

في سنة ٢٠١٦♥:
رغم اني ما حققّت كل الاهداف اللي كنت مخططّة لها؛ رغم ان في اهداف بقت مركونة على رفّ مهجور
الّا  اني سعيدة و فخورة جداً بما قدّمت في هذي السنة♥.


بختم البوست وبقول اتمنى للجميع سنة سعيدة مليئة بالانجازات و الاهداف المُحققّة
ان شاءالله اني ما طوّلت عليكم ؛ اختصرت قدّ ما اقدر ؛ ان شاءالله تستمتعون ب هذي السطور♥.
نلتقي في بوستات جديدة في ٢٠١٧ ♥♥♥.
وداعاً ٢٠١٦ ♥.

You May Also Like

6 التعليقات

  1. طالع لك اني تاركة البوست وقاعدة احاول انطق الكلمات صح 🙊💗💗 لهجتكم فتنة 😩💘

    ردحذف
  2. ان شاءالله سنه2017 اجمل وافضل عليك
    البوست جميل وماينمل منه ❤️😩

    ردحذف
  3. مرا جميل البوست ما شاء الله سنة انجاز بالنسبة لك بالتوفيق علوي و ان شاء الله كل سنة تحققي انجازات و اهداف اكثر 💞 💞

    ردحذف
  4. ليه خلص البوست ��
    علوي أكثر بوست حبيته في مدونتك جد ، اندمجت و أنا اقرآ جداً جداً
    حبيت هالنوع وحسيتك تبدعين فيه أكثر ، ولو إنو كل بوستاتك أحبها .. بس كثري من هالنوع نبغاه شهرياً ��
    وسنتك كانت جميلة ومنجزة ، ويارب ٢٠١٧ كمان تكون أجمل يارب ��

    ردحذف
  5. حبيت البوست حيل
    رحلاتك وتفاصيلها جميلة جداً 💕
    ان شاء الله انجازات عام ٢٠١٧ آكثررر
    وتحققين كل ماتمنيتي

    ردحذف
  6. اللهجة شي والتدوينة شي ثثااننييي ���� اخذت وقت عشان اقرا كويس شكلي خلاص برمس اماراتي ��
    كعادتك علوشه تدويناتك ممتعه جداً والحمدلله على السلامة ♥️♥️

    ردحذف